新股分析系列 - 保利文化 (3636)

差唔多一個星期唔得閒寫財務報表分析系列，要寫返一個新股分析系列補返數，等大家賺下錢啦，呢次講的是保利文化 (3636)。用左成個鐘去睇一份招股書有以下Comment:

公司質素: (25%): 20分

保利係全中國最大的拍賣行，再加上劇院加影院，食晒內需加國策加暴發戶概念。公司現金流十分充裕，交稅十分正常，再加上係國企+KPMG，假數風險低，唯一覺得有問題就係個存貨。公司買左一堆畫係度拎來炒，你都唔知果D畫係真定係假，你話係畢加索畫的水墨畫都得架啦。同埋存貨周轉好慢，差唔多要拎住幅畫成年先賣得出，仲有可能有一D係死貨來。呢個位，核數師識鬼咩。

行業獨特性 (20%): 20分

一句講晒，第一間上市的拍賣行。你可以諗返之前第一間的XX，就知道今次係點啦。無咩其他野可以講，講獨特性係贏晒。

公司估值 (25%): 10分

分數好低係因為真係好貴，PE 25x以上，2012年比2011年仲要係倒退，估值上不太合理。其實公司只係靠拍賣搵其中一半的利潤，仲有一半係靠劇院加影院，估值去到25倍PE其實好貴。

市場氣氛 (30%): 25分

市場氣氛好，小道消息指國際配售超額好多，估計香港公開發售會超100倍以上，加上剛剛惠生超額幾千倍之餘，錢仲回得切抽保利，呢隻應該係萬眾期待。

總分: 75分