新股分析系列 - 保利文化 (3636)

差唔多一個星期唔得閒寫財務報表分析系列，要寫返一個新股分析系列補返數，等大家賺下錢啦，呢次講的是保利文化 (3636)。用左成個鐘去睇一份招股書有以下Comment:

公司質素: (25%): 20分

保利係全中國最大的拍賣行，再加上劇院加影院，食晒內需加國策加暴發戶概念。公司現金流十分充裕，交稅十分正常，再加上係國企+KPMG，假數風險低，唯一覺得有問題就係個存貨。公司買左一堆畫係度拎來炒，你都唔知果D畫係真定係假，你話係畢加索畫的水墨畫都得架啦。同埋存貨周轉好慢，差唔多要拎住幅畫成年先賣得出，仲有可能有一D係死貨來。呢個位，核數師識鬼咩。

行業獨特性 (20%): 20分

一句講晒，第一間上市的拍賣行。你可以諗返之前第一間的XX，就知道今次係點啦。無咩其他野可以講，講獨特性係贏晒。

公司估值 (25%): 10分

分數好低係因為真係好貴，PE 25x以上，2012年比2011年仲要係倒退，估值上不太合理。其實公司只係靠拍賣搵其中一半的利潤，仲有一半係靠劇院加影院，估值去到25倍PE其實好貴。

市場氣氛 (30%): 25分

市場氣氛好，小道消息指國際配售超額好多，估計香港公開發售會超100倍以上，加上剛剛惠生超額幾千倍之餘，錢仲回得切抽保利，呢隻應該係萬眾期待。

總分: 75分

利潤表 (Income statement) (5)

難度:1/5

貼返個利潤表出來先，我諗好多人都無睇返呢個表啦。

再落去就係Selling expenses(銷售費用)同Administrative expenses(行政費用)

Selling expenses顧名思義就係銷售有關的費用，例如廣告咁，要睇佢做得好唔好，可以睇一睇selling expense個增長幅度係唔係同revenue差唔多。如果係，咁姐係公司做推廣真係搵多左生意，相反，就係係度晒錢。

Administrative expenses 係好好的一個指標去睇一間公司做成點，因為administrative expenses佔revenue比重愈大，就姐係代表間公司的效率愈低，又或者公司有好多廢柴或老屎忽。呢D對公司來講唔係一件好事來，所以係同一個估值下，揀一個administrative expenses佔revenue比重低的公司係比較好，最少可以知道間公司的競爭力比較好。

新股分析系列 - 惠生國際(1340)

公司質素 (25%): 10分

首先公司用的唔係四大會計師行，連新上市都唔用就真係十分有趣。然後身處一個條數完全唔知點check的行業，你叫豬肉佬點開單俾你呢? 諗下就知唔知點做啦。之後公司的豬仲可以fair value入帳，(根據HKAS 41, 生物資產可以以公允值減銷售成本入帳) ，由於我已經係超大現代同雨潤食品(呢D第一類產業的公司)輸左好多錢，我係點都唔會再交呢D學費，賺少一次都係咁話。

行業獨特性 (20%): 10分

市場上賣豬肉都提過有雨潤食品，仲要人地一年做過百億生意，惠生仲係講緊十億生意，人地有一半係假數都多佢十倍，無理由唔買龍頭去買佢。就算係普甜食品(1699)都比佢大，所以完全無特別，最多值10分。

公司估值 (25%): 10分

雨潤食品賺唔到錢唔好計，普甜食品個PE同佢差唔多，但係比佢大三倍，我為咩要買惠生? 雖然佢個估值唔似其他新上市的公司，下下幾十倍PE咁上，但係佢係唔係真係賺咁多錢，我就真係唔知了

市場氣氛 (30%): 10分

呢排你邊有聽人話炒新股好賺錢，下下超額幾百倍呢? 所以氣氛一般，雖然未到股災咁，但係新股市場一D都唔熱。

總分: 40分

新股分析系列 - 簡介

好多人叫我寫下股票，唔好成日寫咁理論的文章，教下人地賺錢。小弟不才，唔係好識睇圖賺錢，又唔識得日日炒出炒入來賺錢，但係抽新股好似無咩點輸過錢。所以，第一次寫股票文章就會以新股作為切入點，去分析一下新股究竟入唔入飛好。

港股筆記新股評分準則:

公司質素 (25%): 一間好公司上市之後會升，唔好的公司會跌，就係咁簡單。
行業獨特性 (20%): 第一間上市點都多D人留意，例如:第一間殯儀股, 第一間夜店，遲D可以第一間妓院都會值D
公司估值 (25%): 值100蚊的野1蚊買同10000蚊買係唔係唔同先?
市場氣氛 (30%): 呢個因素其實都好重要，因為新股熱起上來，咩都會升，所以呢一個因素係完全唔可以忽略。

由於每一隻新股的招股都係得幾日時間，即使可以提早拎到招股書(大家知唔知大戶其實可以早D拎到呢?)，都只係得幾日時間去分析，所以新股分析系列只會以短短幾百字來講呢間公司。

最後，買唔買係自己決定，同埋要加D頭盔。

本報告的資料及意見乃源於港股筆記的內部研究活動。本報告內的資料及意見，港股筆記不會就並公正性、準確性、完整性及正確性作出任何申述或保證。本報告所載的資料及意見如有任何更改，港股筆記並不另行通知。港股筆記概不就因任何使用本報告或其內容而產生的任何損失承擔任何責任。本報告亦不存有招攬或邀約購買或出售證券及/或參與任何投資活動的意圖。本報告只供備閱，並不能在未經港股筆記書面同意下，擅自複印或發佈全部或部份內容。

投資物業(Investment Properties) (3) + 會計政策 (Accounting Policy) (1)

難度:3/5

其實仲有一個可能性，根據HKAS 40，公司係可以用成本法將投資物業入帳，姐係點? 姐係20年前用10萬買入的物業，而家個價值都係10萬囉(未計折舊)，已經無咩公司咁蠢會咁做啦，點睇果間公司用咩會計政策? 去睇note 1(g)。

投資物業是按公允價值記賬。投資物業公允價值的變動，或報廢或處置投資物業所產生的任何收益或虧損均在損益中確認。

所以大快活係以公允價值來將佢的投資物業入帳的，而載通(0062)，姐係九巴的母公司，係按成本減累計折舊及減值虧損列賬。姐係代表，其實九巴的投資物業係比佢帳面上值錢的，仲要每一年佢要計提折舊，所以點解載通咁易蝕錢了。

大家可以睇到，唔同的會計政策，係會對不論Income statement或者balance sheet都會有不同影響的，所以要好detail咁睇financial statement，一定要睇佢的會計政策，所謂devil are in details

利潤表 (Income Statement) (4)

難度:1/5

又返返去income statement，講左好耐都係講左幾條line item，如果每一篇都有錢收你話幾好呢。

咁從收入睇落去，就見到cost of sales，咁當然包括食材、人工、租金咁啦，呢個位係大快活來講無咩出奇。

再落就係其他收入同其他所得淨額，通常呢個位都有特別野。我地去睇一睇note4。

其他收入係指利息收入，咁完全無咩得別。

其他所得淨額有D咩呢? 原來今年係有14.3M的賣樓收益，咁的話，扣左佢未比上年其實係倒退? 原來又唔係喎，因為上年都有一個叫退回租賃已收取的補償，都有13.5M。但係如果來年無呢個收益的話，純利可能倒退呢。

係呢個other income係好多時候會有唔同的收益影響當年的利潤，而呢D利潤係對你買一間公司無咩意義，所以係做估值的時候應該要將呢D一次性的項目扣除。

投資物業(Investment Properties) (2)

難度:2/5

又返返去投資物業啦，無可避免，我地買的公司入面一定會有一定數量的投資物業，咁我地點知道佢地投資物業有幾真，果個valuation gain有幾真呢?

以大快活來講，佢地投資物業的估值為58M(可以參考note 12(a))，而一年的租金收入為4.3M，姐係個yield/cap rate(回報率)為7.45%，估值算係合理。點計? 4.3/58咁計

咁點叫合理先? 你諗一諗你好簡單拎去銀行做人仔定期都有2%以上啦，大陸存款仲可以高好多，點都有3-4%，如果個yield得2%未肯定唔合理囉。咁10%又合唔合理? 你諗下，公司梗係想自己個income statement靚D架啦，一定會想投資物業愈高愈好，咁個yield一定會細，如果公司都覺得係有10%，佢的投資物業應該要係日本先得啦。

咁其實佢D投資物業係邊? 根據Listing Rule(上市條例)，佢係要將有關物業的地點披露出來，就係呢度。

利潤表 (Income Statement) (3)

難度:2/5

好啦，又返返去Income statement，咁仲有咩好講先? 我梗係一條條慢慢講來呃稿費啦。見唔見到個難度升左做2?

今次要講一講Revenue(收入/營業額)，大快活的營業額好理所當然地係賣野食啦。大家可以去睇一睇note 3(a).

原來大快活唔單只係賣野食，仲有做收租佬? 其實之前果一篇都有講到大快活係有投資物業啦。咁快唔記得就上返上一個post睇啦。睇多一間大家樂又點?

原來大家樂有咁多樣收入，我地仲可以睇到大家樂集團有D唔係佢地自己直接經營的店舖，因為我地睇到有特許權收入。所以唔同的公司可以有唔同的收入，大家睇收入呢個note就可以睇到公司收入的來源。

投資物業(Investment Properties) (1)

難度: 1/5

點解要無啦啦講左去投資物業呢? 因為港股入面有好多公司都會有投資物業，而每一年的Valuation gains on investment properties(投資物業估值盈餘)係會影響到公司的賺蝕，所以就係呢度寫。

HKAS 40(香港會計準則第40條)係專門針對投資物業的會計準則，入面指出公司係可以將投資物業以公允價值入帳。即係如上次咁講，公司係可以將佢的投資物業以fair value(公允價值)入帳。姐係咩意思? 姐係公司有幢樓租俾人收租，而果個樓價升左，升左果一part就可以當你的收入咁入帳。

但係，投資物業唔只剩係出租的物業，仲包括D等人租(可能係呢一世都租唔出)的物業同埋唔知係度做咩(放係度咩都唔做)的物業。咁產生咩問題呢? 係香港，你好少有一間樓放係度咩都唔做，因為最多收平D，佢都租得出。但係係大陸，佢可以有一大堆吉左係度的單位話打算租出去，但係租唔出都可以當為投資物業。

你地可能會話，租唔出的投資物業邊會值錢呢? 值唔值錢呢D野，唔係你話，唔係我話，係由一個叫valuer(評估師)的人話，佢話幾多就幾多啦。姐係點? 姐係出唔到management要的數的valuer就可以炒囉，反正可以請第二個來做。所以呢條數係我唔會點信的數。

利潤表 (Income Statement) (2)

難度: 1/5

睇完呢個位之後，咁我會點睇呢? 我會睇下佢個revenue (收入), 今年收入增長5.5%，相對上比純利增長幅度少，令到profit margin(純利率)由7.1%升到7.2%。咁可以代表公司效率好左，100蚊的收入由產生7.1蚊利潤變左7.2蚊，但係世事有無咁容易俾你看穿呢? 大家可以睇到當中有一條Valuation gains on investment properties(投資物業估值盈餘)，咁係咩來呢? 根據HKAS 40(香港會計準則第40條)，公司係可以將佢的投資物業以fair value(公允價值)入帳。姐係咩意思? 姐係公司有幢樓租俾人收租，而果個樓價升左，升左果一part就可以當你的收入咁入帳。

上一年呢個gain只有1.8M，而今年係達到9.0M，相差7.2M。咁姐係今年賺多左的9M入面(139M-130M)有7.2M係帳面數來，扣左呢一個gain之後，公司的profit margin係無多到，反而少左添，會計真係奇妙呢……

利潤表 (Income Statement) (1)

難度: 1/5

係知道呢間野算係信得過的時候，就可以開下佢的年報出來睇。呢個教學係會盡量用一間公司來做晒D分析，令到大家對一整份financial statement有比較深的認識。有人提議我用銀行來做分析，小弟不才，我真係唔識睇。所以教學就搵最容易的公司，飲食業來做例子，而我揀選的就係52大快活。咁我地梗係要睇佢賺幾多錢啦，點睇先? 大家可以去睇income statement(損益表)

今年賺左139M港幣，相對於上一年只係賺到130M，增長7%，似乎幾好境，但係點睇佢的profit有幾真呢? 我首先會即刻睇下佢交幾多稅，因為如果連稅都唔足額，profit可能只係帳面數字，咁姐係點睇? 用佢Income Tax(所得稅)除以profit before tax(除稅前溢利)來計算effective tax rate(實際稅率)。實際稅率分別為15.5%同12.9%，睇落今年個profit的水份比較少。大家要知道每個地方的tax rate(稅率)都唔同，例如香港的利得稅率為16.5%，大陸企業所得稅率為25% (雖然有好多其他不同種類的稅同減免，呢個唔係難度1的文章提及了)，咁如果間公司主要係香港做生意，佢的稅率應該會接近16.5%。如果唔接近，姐係代表公司的利潤有一部分係唔駛交稅，亦代表果D利潤好可能係一次性利潤、會計上利潤或者唔係主要業務的利潤。

核數師

難度: 1/5

首先，要分析財務報表，第一樣野，係要睇佢賺幾錢?錯。第一樣野睇應該係睇佢係真定係假。每一間公司都會有一個核數師，而作者都身為一個核數佬，對呢一樣野就特別敏感。因為賺錢賺幾多，完全可以由會計方法創造出來，而且仲可以點整都得，但係整的幅度就睇核數師做成點。

信住先類:

羅兵咸永道(PwC)>畢馬威(KPMG)=安永(EY)>>>>>>德勤(Deloitte)

呢四間所謂四大的公司，雖然都會有假數出現，但係機會率會比較細，而上面呢個排名完全係我對佢地的信任度的排名來。點解要信佢地?其實好簡單姐，佢地大間囉。點解要簡大間先? 打個比喻，一間細細地的上市公司個核數費都幾百萬，如果對一間XYZ陳李張王何會計師事務所來講，係一個好大的數目，俾得咁的錢，當然需要核數師配合一下啦。相反，對於上面果幾間大firm來講，又唔係真係好大數目，雖然佢地都會配合，但係佢地做野都有底線(當然底線的排名如上)，唔會為左一百幾十萬而去坐監的。

其他核數師

採用其他核數師的公司，我係盡量唔會買的。第一，我睇唔通佢盤數係真定係假，咁點解我唔買D我覺得條數真D果D呢，港股有幾千隻股票，只會你無錢買，唔會搵唔到四大做核數的好股票。第二，如果間公司係因為慳錢而用其他核數師，咁就算數啦，差果少少錢都要慳，都唔方賺到好多錢，買唔買都罷。唔係話其他核數師唔好，只係君子不立危墻之下，都係算把啦。

財務報表分析簡介

作者簡介: 核數人一個，所謂會計師及財務風險管理師，CFA pass晒，讀中文中學升左上一間英文的大學，所以D野半中半英。

呢篇個系列的文章，會一路分析整份財務報表及對一間公司的影響，中間係會涉及一些會計的知識，我會盡量簡單解釋，但係無可避免地大家係需要自己做下功課。呢篇文係會用書面語加口語再加D英文打出來，因為我咁樣先打得快，同埋大家的回應請使用繁體中文及減少錯別字。