估值方法(2)

難度:2/5

上一集講到兩間公司同時都係6.67倍的Price/EBITDA，咁係唔係代表兩間公司都係值咁多錢呢?

又睇下呢個表，原來公司A同公司B分別有唔同的現金同負債

	公司 A	公司 B
現金	100	50
負債	(10)	(40)

係做估值的時候，係應該將呢兩筆數扣走

	公司 A	公司 B
現金	100	50
負債	(10)	(40)
市值	500	500
減現金	(100)	(50)
加負債	10	40
EV	410	490

呢個就係叫做EV, 企業價值 (Enterprise Value)

有人問點解係減現金加負債呢?

其實你俾一筆錢來買股票，你係買埋佢的資產返來，如果你買左D現金或者負債返來，你買呢個業務的價錢會相對平左或者貴左，所以係衡量買一個業務返來的價錢的時候，我地有時會用EV/EBITDA來做一個指標，相對上可能會比用PE Ratio比較公平同無咁受每一間公司的會計政策影響，但係仍然會受其他會計準則影響，例如投資物業公允價值收益。所以請你睇返我之前寫過的野，去排除一些一次性或者會計處理的影響。

估值方法(1)

難度:2/5

大部分人都會去睇一睇PE ratio，姐係Price/Earning，但係用呢個方法做估值係唔係一個好的方法呢?

假設以下有兩間公司，個股價同盈利係咁，而個業務等等所有野都一樣。

	股價	每股利潤	P/E
公司 A	100	10	10
公司 B	100	5	20

係唔係公司A平好多先?

但係原來佢地可能用同一部機器，一個用5年來做折舊，一個用10年來做折舊

好似咁

	公司 A	公司 B
收入	100	100
支出	(90)	(95)
利潤	10	5
支出明細	公司 A	公司 B
直接支出	85	85
折舊	5	10
總數	90	95
	公司 A	公司 B
利潤	10	5
折舊	5	10
EBITDA	15	15

其實原來到最後又係因為會計政策上的差別而造成利潤上有差別

點解可以咁，返去溫下書，睇返會計政策啦

所以如果以營運一間公司來講，PE Ratio未必係一個公平的方法

要引入EBITDA呢個概念

EBITDA係稅息折舊及攤銷前利潤 (Earnings Before Interest, Taxes, Depreciation and Amortization)，有D人認為EBITDA姐係Earnings before everything，但係用來睇一間公司的營運，一般來講都會係咁。Apply係之前果個例子

	公司 A	公司 B
收入	100	100
支出	(90)	(95)
利潤	10	5
支出明細	公司 A	公司 B
直接支出	85	85
折舊	5	10
總數	90	95
	公司 A	公司 B
利潤	10	5
折舊	5	10
EBITDA	15	15
P/EBITDA	6.67	6.67

兩間公司的Price/EBITDA就會係完全一樣

咁係唔係代表兩間公司的估值係相同呢?

分析基本功(3)

難度:2/5

點解要整一個佔營業額比例出來呢?

因為要睇返真正的營運情況，一定要咁做，無可能一間公司每年的利潤都係靠賣資產，物業重估等待方法去賺錢，識睇一定係睇營運。

首先可以睇到個毛利率其實變化唔大，兩年都維持大約13.6%-13.7%

姐係代表佢成本方面，包括食材、水電煤、人工、租金等等的加幅係可以全數轉嫁去消費者身上面

而銷售費用同行政費用佔營業額百分比下跌，姐係代表營運效率高左，一個人可以做多左野而俾的錢無多到。

單以營運角度來睇，大快活的業績係比上一年好，千析唔好俾一時的會計利潤蒙蔽。  

投資物業(Investment Properties) (2)

難度:2/5

又返返去投資物業啦，無可避免，我地買的公司入面一定會有一定數量的投資物業，咁我地點知道佢地投資物業有幾真，果個valuation gain有幾真呢?

以大快活來講，佢地投資物業的估值為58M(可以參考note 12(a))，而一年的租金收入為4.3M，姐係個yield/cap rate(回報率)為7.45%，估值算係合理。點計? 4.3/58咁計

咁點叫合理先? 你諗一諗你好簡單拎去銀行做人仔定期都有2%以上啦，大陸存款仲可以高好多，點都有3-4%，如果個yield得2%未肯定唔合理囉。咁10%又合唔合理? 你諗下，公司梗係想自己個income statement靚D架啦，一定會想投資物業愈高愈好，咁個yield一定會細，如果公司都覺得係有10%，佢的投資物業應該要係日本先得啦。

咁其實佢D投資物業係邊? 根據Listing Rule(上市條例)，佢係要將有關物業的地點披露出來，就係呢度。

利潤表 (Income Statement) (3)

難度:2/5

好啦，又返返去Income statement，咁仲有咩好講先? 我梗係一條條慢慢講來呃稿費啦。見唔見到個難度升左做2?

今次要講一講Revenue(收入/營業額)，大快活的營業額好理所當然地係賣野食啦。大家可以去睇一睇note 3(a).

原來大快活唔單只係賣野食，仲有做收租佬? 其實之前果一篇都有講到大快活係有投資物業啦。咁快唔記得就上返上一個post睇啦。睇多一間大家樂又點?

原來大家樂有咁多樣收入，我地仲可以睇到大家樂集團有D唔係佢地自己直接經營的店舖，因為我地睇到有特許權收入。所以唔同的公司可以有唔同的收入，大家睇收入呢個note就可以睇到公司收入的來源。