Income statement (8)

難度:3/5

識睇Income statement就一定要識睇income tax，呢個係一個幾好的標準用來睇一間公司係唔係由於會計的調整而令到利潤增加或者減少，因為”虛數”的增加或者減少係通常唔會影響稅務上的利潤(Taxable income)，而稅務上的利潤通常都係指主營業務下面的利潤。

睇Income tax係唔可以剩係睇income statement上面的income tax的數字，因為中間仲會有遞延稅*(deferred tax)的影響，所以識睇梗係去睇note。

*有關遞延稅呢一樣野，簡直係為做而做，令到大家睇唔明的事，有機會先至慢慢講 

 

通常睇note我就只係會睇current tax，咁就可以知道應稅收入有幾多

係note上面係會見到香港方面差唔多要交多300萬稅，以香港稅率16.5%來計算2,909/16.5%，係代表增加左1763萬的profit，而見到中國果邊係唔駛交稅，姐係代表佢係蝕緊錢。

係唔係同我地一開始睇果盤數唔同呢?

利潤表 (Income statement) (7)

難度:1/5

係固定資產減值下面，就係之前講過的Valuation gains on investment properties，自己追返之前D文去睇我講Investment properties啦。

再去就係finance cost (融資成本)，其實最主要就係大家講的利息，姐係借左錢要俾的利息。但係利息係唔係一定係支出呢? 好多時候，公司根據HKAS 23 (Revised) 將利息資本化，而做呢D做得最多的係房地產公司。例如0001長實

原來8億利息，落左盤數上面的支出只係3.5億，資本化左的利息就會當為成本咁放係存貨度，所以睇一間公司的融資成本/財務支出係未必能夠反映佢相應俾左幾多利息。其實，大家如果有內房股就會發覺佢地的利息資本化十分利害，好似0688中國海外咁

24億利息支出，資本化左21億，其實利息資本化就好似慢性毒藥一樣，資本化得多，過幾年，個GP (毛利) 就會跌落來。所以大家要小心睇清楚後面的附注。

利潤表 (Income statement) (6) + 固定資產 (Property, plant and equipment) (2)

難度:1/5

點解要講左PP&E先? 因為再落一條line我就要講到佢。

固定資產減值虧損淨額 (Net impairment losses on fixed assets)，咁姐係咩來?

回憶起上一篇講PP&E的文，你買左一件100蚊的機器，原本你覺得佢可以用5年的，咁用左一年之後，扣左1年的折舊($20)，係帳面上就有80蚊坐左係度，但係原來，你去檢查一下件機器，發覺呢件強國製造的機器已經五勞七傷，你估佢只係值10蚊，咁你係呢個時候就會出現70蚊的impartment losses ($80-$10)。咁究竟大快活發生左咩事呢?睇一睇note 12(d)

原來佢係覺得有啲分店係收唔返佢裝修同買器材的成本，所以佢就出現呢個減值了。其實每次公司覺得佢的資產唔值咁多錢的時候，就會出現impairment(減值)了，有機會再同大家講下減值。

利潤表 (Income statement) (5)

難度:1/5

貼返個利潤表出來先，我諗好多人都無睇返呢個表啦。

再落去就係Selling expenses(銷售費用)同Administrative expenses(行政費用)

Selling expenses顧名思義就係銷售有關的費用，例如廣告咁，要睇佢做得好唔好，可以睇一睇selling expense個增長幅度係唔係同revenue差唔多。如果係，咁姐係公司做推廣真係搵多左生意，相反，就係係度晒錢。

Administrative expenses 係好好的一個指標去睇一間公司做成點，因為administrative expenses佔revenue比重愈大，就姐係代表間公司的效率愈低，又或者公司有好多廢柴或老屎忽。呢D對公司來講唔係一件好事來，所以係同一個估值下，揀一個administrative expenses佔revenue比重低的公司係比較好，最少可以知道間公司的競爭力比較好。

利潤表 (Income Statement) (4)

難度:1/5

又返返去income statement，講左好耐都係講左幾條line item，如果每一篇都有錢收你話幾好呢。

咁從收入睇落去，就見到cost of sales，咁當然包括食材、人工、租金咁啦，呢個位係大快活來講無咩出奇。

再落就係其他收入同其他所得淨額，通常呢個位都有特別野。我地去睇一睇note4。

其他收入係指利息收入，咁完全無咩得別。

其他所得淨額有D咩呢? 原來今年係有14.3M的賣樓收益，咁的話，扣左佢未比上年其實係倒退? 原來又唔係喎，因為上年都有一個叫退回租賃已收取的補償，都有13.5M。但係如果來年無呢個收益的話，純利可能倒退呢。

係呢個other income係好多時候會有唔同的收益影響當年的利潤，而呢D利潤係對你買一間公司無咩意義，所以係做估值的時候應該要將呢D一次性的項目扣除。

利潤表 (Income Statement) (3)

難度:2/5

好啦，又返返去Income statement，咁仲有咩好講先? 我梗係一條條慢慢講來呃稿費啦。見唔見到個難度升左做2?

今次要講一講Revenue(收入/營業額)，大快活的營業額好理所當然地係賣野食啦。大家可以去睇一睇note 3(a).

原來大快活唔單只係賣野食，仲有做收租佬? 其實之前果一篇都有講到大快活係有投資物業啦。咁快唔記得就上返上一個post睇啦。睇多一間大家樂又點?

原來大家樂有咁多樣收入，我地仲可以睇到大家樂集團有D唔係佢地自己直接經營的店舖，因為我地睇到有特許權收入。所以唔同的公司可以有唔同的收入，大家睇收入呢個note就可以睇到公司收入的來源。

利潤表 (Income Statement) (2)

難度: 1/5

睇完呢個位之後，咁我會點睇呢? 我會睇下佢個revenue (收入), 今年收入增長5.5%，相對上比純利增長幅度少，令到profit margin(純利率)由7.1%升到7.2%。咁可以代表公司效率好左，100蚊的收入由產生7.1蚊利潤變左7.2蚊，但係世事有無咁容易俾你看穿呢? 大家可以睇到當中有一條Valuation gains on investment properties(投資物業估值盈餘)，咁係咩來呢? 根據HKAS 40(香港會計準則第40條)，公司係可以將佢的投資物業以fair value(公允價值)入帳。姐係咩意思? 姐係公司有幢樓租俾人收租，而果個樓價升左，升左果一part就可以當你的收入咁入帳。

上一年呢個gain只有1.8M，而今年係達到9.0M，相差7.2M。咁姐係今年賺多左的9M入面(139M-130M)有7.2M係帳面數來，扣左呢一個gain之後，公司的profit margin係無多到，反而少左添，會計真係奇妙呢……

利潤表 (Income Statement) (1)

難度: 1/5

係知道呢間野算係信得過的時候，就可以開下佢的年報出來睇。呢個教學係會盡量用一間公司來做晒D分析，令到大家對一整份financial statement有比較深的認識。有人提議我用銀行來做分析，小弟不才，我真係唔識睇。所以教學就搵最容易的公司，飲食業來做例子，而我揀選的就係52大快活。咁我地梗係要睇佢賺幾多錢啦，點睇先? 大家可以去睇income statement(損益表)

今年賺左139M港幣，相對於上一年只係賺到130M，增長7%，似乎幾好境，但係點睇佢的profit有幾真呢? 我首先會即刻睇下佢交幾多稅，因為如果連稅都唔足額，profit可能只係帳面數字，咁姐係點睇? 用佢Income Tax(所得稅)除以profit before tax(除稅前溢利)來計算effective tax rate(實際稅率)。實際稅率分別為15.5%同12.9%，睇落今年個profit的水份比較少。大家要知道每個地方的tax rate(稅率)都唔同，例如香港的利得稅率為16.5%，大陸企業所得稅率為25% (雖然有好多其他不同種類的稅同減免，呢個唔係難度1的文章提及了)，咁如果間公司主要係香港做生意，佢的稅率應該會接近16.5%。如果唔接近，姐係代表公司的利潤有一部分係唔駛交稅，亦代表果D利潤好可能係一次性利潤、會計上利潤或者唔係主要業務的利潤。