利潤表 (Income statement) (6) + 固定資產 (Property, plant and equipment) (2)

難度:1/5

點解要講左PP&E先? 因為再落一條line我就要講到佢。

固定資產減值虧損淨額 (Net impairment losses on fixed assets)，咁姐係咩來?

回憶起上一篇講PP&E的文，你買左一件100蚊的機器，原本你覺得佢可以用5年的，咁用左一年之後，扣左1年的折舊($20)，係帳面上就有80蚊坐左係度，但係原來，你去檢查一下件機器，發覺呢件強國製造的機器已經五勞七傷，你估佢只係值10蚊，咁你係呢個時候就會出現70蚊的impartment losses ($80-$10)。咁究竟大快活發生左咩事呢?睇一睇note 12(d)

原來佢係覺得有啲分店係收唔返佢裝修同買器材的成本，所以佢就出現呢個減值了。其實每次公司覺得佢的資產唔值咁多錢的時候，就會出現impairment(減值)了，有機會再同大家講下減值。

固定資產 (Property, plant and equipment) (1)

難度:1/5

係再講Income statement之前，要介紹一下咩係固定資產，其實就包括樓,機器,車,裝修又可以係風水擺設,神像,私人飛機同遊艇，你諗得出都會有。其實就一句講晒係佢的生財工具。

係會計入面，如果用100蚊來買左件工具的話，當年的支出未必係100蚊，因為假設果件野可以用5年，個支出應該分開5年入，姐係每年20蚊支出，而呢個就係Depreciation (折舊)，剩下來的數就放左係固定資產呢個項目入面。咁樣點定果樣野可以用幾耐先?無架，又係公司點定都得，不過佢地會將呢一樣野係會計政策入面披露。例如大快活: 

你就要睇一睇佢呢個披露出來的使用年期係唔係合理，又例如0045大酒店:

原來間酒店可以用150年，你信唔信?

新股分析系列 - 保利文化 (3636)

差唔多一個星期唔得閒寫財務報表分析系列，要寫返一個新股分析系列補返數，等大家賺下錢啦，呢次講的是保利文化 (3636)。用左成個鐘去睇一份招股書有以下Comment:

公司質素: (25%): 20分

保利係全中國最大的拍賣行，再加上劇院加影院，食晒內需加國策加暴發戶概念。公司現金流十分充裕，交稅十分正常，再加上係國企+KPMG，假數風險低，唯一覺得有問題就係個存貨。公司買左一堆畫係度拎來炒，你都唔知果D畫係真定係假，你話係畢加索畫的水墨畫都得架啦。同埋存貨周轉好慢，差唔多要拎住幅畫成年先賣得出，仲有可能有一D係死貨來。呢個位，核數師識鬼咩。

行業獨特性 (20%): 20分

一句講晒，第一間上市的拍賣行。你可以諗返之前第一間的XX，就知道今次係點啦。無咩其他野可以講，講獨特性係贏晒。

公司估值 (25%): 10分

分數好低係因為真係好貴，PE 25x以上，2012年比2011年仲要係倒退，估值上不太合理。其實公司只係靠拍賣搵其中一半的利潤，仲有一半係靠劇院加影院，估值去到25倍PE其實好貴。

市場氣氛 (30%): 25分

市場氣氛好，小道消息指國際配售超額好多，估計香港公開發售會超100倍以上，加上剛剛惠生超額幾千倍之餘，錢仲回得切抽保利，呢隻應該係萬眾期待。

總分: 75分

利潤表 (Income statement) (5)

難度:1/5

貼返個利潤表出來先，我諗好多人都無睇返呢個表啦。

再落去就係Selling expenses(銷售費用)同Administrative expenses(行政費用)

Selling expenses顧名思義就係銷售有關的費用，例如廣告咁，要睇佢做得好唔好，可以睇一睇selling expense個增長幅度係唔係同revenue差唔多。如果係，咁姐係公司做推廣真係搵多左生意，相反，就係係度晒錢。

Administrative expenses 係好好的一個指標去睇一間公司做成點，因為administrative expenses佔revenue比重愈大，就姐係代表間公司的效率愈低，又或者公司有好多廢柴或老屎忽。呢D對公司來講唔係一件好事來，所以係同一個估值下，揀一個administrative expenses佔revenue比重低的公司係比較好，最少可以知道間公司的競爭力比較好。

新股分析系列 - 惠生國際(1340)

公司質素 (25%): 10分

首先公司用的唔係四大會計師行，連新上市都唔用就真係十分有趣。然後身處一個條數完全唔知點check的行業，你叫豬肉佬點開單俾你呢? 諗下就知唔知點做啦。之後公司的豬仲可以fair value入帳，(根據HKAS 41, 生物資產可以以公允值減銷售成本入帳) ，由於我已經係超大現代同雨潤食品(呢D第一類產業的公司)輸左好多錢，我係點都唔會再交呢D學費，賺少一次都係咁話。

行業獨特性 (20%): 10分

市場上賣豬肉都提過有雨潤食品，仲要人地一年做過百億生意，惠生仲係講緊十億生意，人地有一半係假數都多佢十倍，無理由唔買龍頭去買佢。就算係普甜食品(1699)都比佢大，所以完全無特別，最多值10分。

公司估值 (25%): 10分

雨潤食品賺唔到錢唔好計，普甜食品個PE同佢差唔多，但係比佢大三倍，我為咩要買惠生? 雖然佢個估值唔似其他新上市的公司，下下幾十倍PE咁上，但係佢係唔係真係賺咁多錢，我就真係唔知了

市場氣氛 (30%): 10分

呢排你邊有聽人話炒新股好賺錢，下下超額幾百倍呢? 所以氣氛一般，雖然未到股災咁，但係新股市場一D都唔熱。

總分: 40分